ប្រភពរូប៖ CCFR

ឯកឧត្តម ផុស សុវណ្ណ បានមានប្រសាសន៍ថា ក្រៅពីផ្សព្វផ្សាយព័ត៌មានដល់សាធារណជន ប្រព័ន្ធផ្សព្វផ្សាយទាំងអស់ គឺពិតដើរតួនាទីយ៉ាងសំខាន់ក្នុងការអប់រំ និង ការបញ្ជ្រាបវប្បធម៌រវាងកម្ពុជា និងចិនតាមគ្រប់រូបភាព និងគ្រប់មធ្យោបាយ។ នេះបើយោងតាមវិទ្យុមិត្តភាពកម្ពុជា-ចិន។

នៅក្នុងវេទិកាជាន់ខ្ពស់នៃប្រព័ន្ធផ្សព្វផ្សាយកម្ពុជា-ចិន និងវេទិកាផ្លាស់ប្ដូរវប្បធម៌កម្ពុជា-ចិន លើកទី ៣ ឯកឧត្តម ផុស សុវណ្ណ អគ្គនាយក នៃអគ្គនាយកដ្ឋានព័ត៌មាន និងសោតទស្សន៍ក្រសួងព័ត៌មាន មានប្រសាសន៍ថា អ្នកសារព័ត៌មានបានផ្សព្វផ្សាយ តាមរយៈមធ្យោបាយផ្សេងៗដូចជាសៀវភៅ ទស្សនាវដ្ដី កម្មវិធីទូរទស្សន៍ និងអ៊ិនធឺណិតជាដើម ប្រព័ន្ធផ្សព្វផ្សាយអាចបញ្ជ្រាបចំណេះដឹងវប្បធម៌ផ្សេងៗដល់សាធារណជន និងលើកកម្ពស់អក្ខរកម្មវប្បធម៌របស់ប្រជាជន។

ឯកឧត្តមបញ្ជាក់ថា ប្រព័ន្ធផ្សព្វផ្សាយក្នុងពេលកំពុងបន្តស្នងវប្បធម៌ប្រពៃណីដ៏ល្អឆ្នើមហើយ ក៏បានជំរុញការច្នៃប្រឌិត និងការអភិវឌ្ឍវប្បធម៌ផងដែរ។ ថ្មីៗនេះ អគ្គស្ថានីយវិទ្យុ និង ទូរទស្សន៍មជ្ឈិមចិន បានរៀបចំផែនការរៀបចំការតាំងពិព័រណ៍ទេសចរណ៍ជាសកលមួយឈ្មោះថា "អ្វីជាអរិយធម៌" ដោយប្រើការច្នៃប្រឌិតបច្ចេកវិទ្យាបែបឌីជីថល និងទំនើប ដើម្បីស្តារវប្បធម៌ប្រពៃណីដ៏ល្អឥតឆ្នើម និងបំពេញតួនាទីយ៉ាងសកម្មនៃប្រព័ន្ធផ្សព្វផ្សាយក្នុងការលើកកម្ពស់ការផ្លាស់ប្តូរ និងការរៀនសូត្រពីគ្នាទៅវិញទៅមករវាងអរិយធម៌ផ្សេងៗគ្នា។

នៅដើមឆ្នាំ ២០២៣ អគ្គស្ថានីយវិទ្យុនិងទូរទស្សន៍មជ្ឈិមចិនបានចុះហត្ថលេខាលើអនុស្សរណៈនៃកិច្ចសហប្រតិបត្តិការជាមួយក្រសួងព័ត៌មាន។ ជាមួយគ្នានេះលោកបានអំពាវនាវឱ្យប្រព័ន្ធផ្សព្វផ្សាយកម្ពុជា និងចិនសហការគ្នាយ៉ាងសកម្ម និងពង្រឹងកិច្ចសហប្រតិបត្តិការក្នុងការផ្លាស់ប្តូរព័ត៌មាន ទំនាក់ទំនងធនធានមនុស្ស និងការច្នៃប្រឌិតបច្ចេកវិទ្យាប្រព័ន្ធផ្សព្វផ្សាយជាដើម ដើម្បីជួយធ្វើឱ្យទំនាក់ទំនងកម្ពុជាចិនបន្តដំណើរទៅមុខឆ្ពោះទៅកម្រិតថ្មីមួយទៀត និងរួមចំណែកជាថាមពលនៃប្រព័ន្ធផ្សព្វផ្សាយដល់ «ឆ្នាំ ២០២៤ នៃការផ្លាស់ប្តូរប្រជាជននិងប្រជាជនកម្ពុជា-ចិន»៕