កម្ពុជា-ចិន ​បើកការ​ដ្ឋាន​ និង​បញ្ជា​គ្រឿង​ចក្រ​សាងសង់​ នៃ​គម្រោង​អភិវឌ្ឍន៍​អាងទឹក​ដងកាំបិត​ ស្ថិត​ក្នុង​ភូមិ​ស្រែខ្សាច់​ ឃុំ​ដងកាំបិត​ ស្រុក​សណ្តាន់​ ខេត្ត​កំពង់ធំ​ ក្រោម​​ហិរញ្ញប្បទាន​សម្បទាន​ពី​ធនាគារ​ អាហរ័ណ​ នីហរ័ណ​ចិន​ (EXIMBANK​)​ តាម​រយៈ​ក្រសួង​សេដ្ឋកិច្ច​ និង​ហិរញ្ញវ​ត្ថុកម្ពុជា។​ ក្រោមវត្តមានឯកឧត្តម ថោ ជេដ្ឋា រដ្ឋ​មន្ត្រី​ក្រសួង​ធនធានទឹក​ និង​ឧតុនិយម​ និងលោកស្រី Zhong Jie ទី​ប្រឹក្សា​នៃ​ស្ថាន​ទូត​ចិន​ប្រចាំ​កម្ពុជា​។

ឯកឧត្តម ថោ ជេដ្ឋា បានមានប្រសាសន៍ថា «ការសាងសង់​ និង​អភិវឌ្ឍន៍អាងទឹកដងកាំបិតនាពេលនេះបានបង្ហាញពីការយកចិត្តទុកដាក់របស់រាជរដ្ឋាភិបាល ក្នុងការគ្រប់គ្រងទឹក បញ្ជាទឹក ដើម្បីធានាផ្គត់ផ្គង់ទឹកសម្រាប់ស្រោចស្រពផ្ទៃដីកសិកម្មនៅផ្នែកខាងក្រោម បង្កើនផលិតកម្មស្បៀង ព្រមទាំងធានាទឹកសម្រាប់ប្រើប្រាស់ក្នុងជីវភាពរស់នៅប្រចាំថ្ងៃ និងក្នុងផ្នែកឧស្សាហកម្ម កសិកម្ម ដែលជាផ្នែកមួយជួយលើកស្ទួយដល់គោលនយោបាយជាតិស្តីពីសន្តិសុខស្បៀងប្រកបដោយប្រសិទ្ធភាព ក្នុងដំណាក់កាលនៃការប្រែប្រួលអាកាសធាតុ»។

គួរបញ្ជាក់ថា គម្រោងអភិវឌ្ឍន៍អាងទឹកដងកាំបិត ត្រូវប្រើរយៈពេល ៤៨ខែ​ ដើម្បីសាងសង់ ដោយគិតចាប់ពីថ្ងៃទី៤ ខែធ្នូ ឆ្នាំ២០២៣។ ក្នុងនោះមានការសាងសង់ខ្នងទំនប់សរុបប្រវែង ២,៦៨០ម៉ែត្រ ដែលរួមមានទំនប់​ដី​ខាងឆ្វេង​ប្រវែង​ ១,១៣៦ម៉ែត្រ​ ទំនប់​បង្ហៀរទឹកប្រវែង ៣០៦ម៉ែត្រ ទំនប់​បេតុងប្រវែង ៥០ម៉ែត្រ និងទំនប់ដីខាងស្តាំប្រវែង ១,១៨៨ម៉ែត្រ ខ្នង​ទំនប់មានកម្ពស់ ៤០ម៉ែត្រធៀបនឹងនីវ៉ូទឹកសមុទ្រ។ ក្រោយការ​សាង​សង់​រួចប្រជាកសិករចំនួន ២៥,០០០គ្រួសារ ស្មើនឹង ៨៥,៣០០នាក់ ក្នុង​ស្រុកបារាយណ៍ ស្រុកសណ្តាន់ ស្រុកសន្ទុក ស្រុកស្ទោង ស្រុកកំពង់ស្វាយ និង​ស្រុក​ប្រាសាទសំបូរ​ នៃ​ខេត្ត​កំពង់ធំ​នឹងបានទទួលផលពីការអភិវឌ្ឍ​អាង​នេះផងដែរ៕