ដើម្បីបង្ហាញពីកិច្ចសហប្រត្តិបត្តិការល្អរវាងប្រទេសកម្ពុជា-ចិន វិទ្យាស្ថានខុនជឺ នៃរាជបណ្ឌិត្យសភាកម្ពុជា និងសភាពាណិជ្ជកម្មចិន នៅកម្ពុជា មានការគាំទ្រដោយ ស្ថានទូតសាធារណរដ្ឋប្រជាមានិតចិន ប្រចាំនៅកម្ពុជា និងរាជបណ្ឌិតសភាកម្ពុជា បានរៀបចំកម្មវិធី «អបអរពិធីបុណ្យចូលឆ្នាំថ្មី ប្រពៃណីចិន ២០២៤» នៅបរិវេនសួនទីក្រុងកម្សាន្តកោះពេជ្រ។

ជាក់ស្តែង មុននឹងចាប់ផ្តើម កម្មវិធី «អបអរពិធីបុណ្យចូលឆ្នាំថ្មី ប្រពៃណីចិន ២០២៤» ក៏មានការបង្ហាញរបាំតោ និងរបាំនាគ ដែលតំណាងឲ្យសត្វមានឫទ្ធានុភាព ឬគេតែងហៅថា របាំម៉ុងសាយ ដែលតាមជំនឿជនជាតិចិន បានជឿជាក់ថា​ សត្វម៉ុងសាយ គឺជាសត្វដែលតំណាងឲ្យប្រផ្នូលល្អ ហើយការឡកម៉ុងសាយ មានប្រវត្តិជាយូរយារមកហើយក្នុងប្រវត្តិសាស្ត្រចិន។ មានរឿងតំណាលតៗគ្នាក្នុងប្រទេសចិនថា «ឬសម្លេងជួងមាស នឹងមានមាសរាប់ម៉ឺនតម្លឹង បើកភ្នែកសត្វម៉ុងសាយ នឹងថ្កុំថ្កើងមានបាន» ដូចនេះ មុននឹងចាប់ផ្តើមឡកម៉ុងសាយ ប្រជាជនចិនតែមានការរៀបចំពិធីមួយដែលមានឈ្មោះថា «ពិធីបើកភ្នែកសត្វម៉ុងសាយ»។ ពិធីនេះមានន័យថា ដាស់សត្វនាគ ដាស់សត្វនាគ សត្វម៉ុងសាយ​ ហើយក៏ផ្តល់ថាមពល និងដួងវិញ្ញាណដល់សត្វទាំងពីរនេះ ដែលបង្កប់អត្ថន័យថា មានសិរីសួស្តី អាចពង្រីកគោលដៅឲ្យធំជាងមុនថែមទៀត។

ជាមួយគ្នានេះ ក៏មានការសម្តែងនូវផ្ទាំងទស្សនីយភាពជាច្រើនទៀតដូចជា៖ ការសម្តែងក្បាច់គុនផ្លិតថៃជី, បកស្រាយចម្រៀង «ទេវតាទ្រព្យមកផ្ទះខ្ញុំ», របាំ «ត្រីធំ», របាំ «មុខវិជ្ជាលេខ៣», សិល្បៈនៃការសរសេរជក់ មានប្រវត្តិដ៏យូរលង់ណាស់មកហើយ។ ក្រៅពីផ្ទាំងទស្សនីយភាពទាំងនេះ ក៏មានកន្លែងកម្សាន្ត និងស្តង់តាំងពិព័រណ៍ចម្រុះដូចជា ការទាយប្រស្នាគោម, ល្បែងកម្សាន្តគប់ព្រួញ, គូស និងផាត់ពណ៌ស្រោមមុខ, ម្ហូបអាហារ, នំខ្មែរ និងបានបើកទូលាយឲ្យមហាជនចូលទស្សនាដោយសេរី និងឥតគិតថ្លៃផងដែរ៕