TNAOT News

· 02-06

កម្ពុជា ក្នុងពិធីបើក «ឆ្នាំនៃការផ្លាស់ប្តូរប្រជាជន និងប្រជាជនអាស៊ាន-ចិន» ខេត្តFujian ប្រទេសចិន

#សង្គម# #ផ្លាស់ប្តូរវប្បធម៌កម្ពុជាចិន# #ព័ត៌មានសង្គម# #ប្រជាជនកម្ពុជាចិន#

7406

ឯកឧត្តម ប្រាក់ ផាន់ណារ៉ា រដ្ឋលេខាធិការក្រសួងទេសចរណ៍ បានចូលរួមកម្មវិធីបើក «ឆ្នាំនៃការផ្លាស់ប្តូរប្រជាជននិងប្រជាជនអាស៊ាន-ចិន» ASEAN-CHINA YEAR OF PEOPLE-TO-PEOPLE EXCHANGES នៅទីក្រុងFuzhou ខេត្តFujian ប្រទេសចិន។

ក្នុងឱកាសនោះ នាយករដ្ឋមន្ត្រីចិនលោក Li Qiang ក៏បានផ្ញើលិខិតអបអរសាទរដល់ពិធីសម្ពោធឆ្នាំនៃ ការផ្លាស់ប្តូរប្រជាជន និងប្រជាជន ចិន-អាស៊ាន ដោយមានអត្ថន័យថា «ភាពជាដៃគូយុទ្ធសាស្ត្រគ្រប់ជ្រុងជ្រោយចិន-អាស៊ាន ទទួលបានសន្ទុះនៃការអភិវឌ្ឍ ហើយកិច្ចសហប្រតិបត្តិការលើវិស័យផ្សេងៗបានផ្តល់លទ្ធផលជាផ្លែផ្កា ហើយការបោះជំហានថ្មីត្រូវបានធ្វើឡើងក្នុងគោលបំណងកសាងសហគមន៍ចិន-អាស៊ានជាមួយនឹងអនាគតរួមគ្នា។ ឆ្នាំចិន-អាស៊ាននៃការផ្លាស់ប្តូរប្រជាជន និងប្រជាជន ជាឱកាសមួយដើម្បីលើកកម្ពស់ការយល់ដឹងគ្នាទៅវិញទៅមក និងមិត្តភាពរវាងប្រជាជននៃភាគីទាំងពីរ កសាងសហគមន៍ចិន-អាស៊ានឱ្យកាន់តែជិតស្និទ្ធជាមួយការចែករំលែកអនាគតជាមួយគ្នា និងកសាងមាតុភូមិដ៏សុខសាន្ត សុវត្ថិភាព វិបុលភាព ភាពស្រស់ស្អាត និងទឹកដីកំណើតរួមគ្នា»។

គួរបញ្ជាក់ផងដែរថា កាលពីថ្ងៃទី១៣ ខែមករា ឆ្នាំ២០២៤ កន្លងទៅកម្ពុជា-ចិន ក៏បានរៀបចំ ពិធី​បើក​ «ឆ្នាំ​នៃការផ្លាស់ប្ដូរ​ប្រជាជន​និង​ប្រជាជន​ កម្ពុជា​-ចិន​ ២០២៤» នៅបរិវេណ​ព្រះលានជល់ដំរី ខេត្តសៀមរាប ក្រោមវត្តមានថ្នាក់ដឹកនាំ និងគណៈប្រតិភូនៃប្រទេសចិន និង សិល្បករ សិល្បការិនី អ្នកទេសចរចិនប្រមាណ ៥០០នាក់ចូលរួម ព្រមទាំងមានការសម្តែងសិល្បៈ របាំ និងតន្ត្រីផ្សេងៗ បង្ហាញនូវការផ្លាស់ប្ដូរវប្បធម៌រវាងគ្នា ដែលជាការបញ្ជាក់នូវសាមគ្គីភាពល្អ ចំណងមិត្តភាពដ៏ប្រសើរ និងការរួមបញ្ចូលគ្នារវាង ទស្សនីយភាពសិល្បៈដ៏អស្ចារ្យ ដើម្បីផ្តិតយករូបភាពដ៏ប្រណិតៗ ទៅផ្សព្វផ្សាយដល់ប្រជាជនចិន ក៏ដូចជាប្រទេសក្នុងតំបន់ និងទៅកាន់ពិភពលោកផងដែរ៕

សេចក្តីថ្លែងការណ៍លើកលែង

អត្ថបទនេះបានមកពីអ្នកប្រើប្រាស់របស់ TNAOT APP មិនតំណាងឱ្យទស្សនៈ និង​គោលជំហរណាមួយរបស់យើងខ្ញុំឡើយ។ ប្រសិនបើមានបញ្ហាបំពានកម្មសិទ្ធិ សូមទាក់ទងមកកាន់យើងខ្ញុំដើម្បីបញ្ជាក់ការលុប។

យោបល់ទាំងអស់ (0)

ការណែនាំពិសេស