ប៉ូលិសថៃបានបើកការស៊ើបអង្កេតលើករណីជនជាតិវៀតណាមចំនួន៦នាក់ស្លាប់ក្នុងសណ្ឋាគារលំដាប់ផ្កាយ៥ Grand Hyatt Erawan នៅចំកណ្តាលទីក្រុងបាងកក ប្រទេសថៃ។ នេះបើតាមការចុះផ្សាយដោយទីភ្នាក់ងារសារព័ត៌មាន CNA កាលពីថ្ងៃទី១៦ ខែកក្កដា ឆ្នាំ២០២៤កន្លងទៅ។​

បន្ទាប់ពីប្រទះឃើញសាកសពមនុស្ស​ទាំង ៦​នាក់​សុទ្ធ​តែ​ជា​ជន​បរទេស ដែលមានជនជាតិវៀតណាម ៣នាក់ជាបុរស ៣នាក់ជាស្រ្តី ក៏មានការរបាយការណ៍លើកឡើងខុសៗនៅក្នុងប្រព័ន្ធផ្សព្វផ្សាយថៃមួយចំនួនអំពីមូលហេតុនៃការស្លាប់ ប៉ុន្តែប៉ូលិសថៃបានបញ្ជាក់ថា «ពួកគេស្លាប់ដោយសារការបំពុល មិនមែនដោយសារការបាញ់ប្រហារដូចទៅនឹងលើកឡើងនោះទេ ព្រោះប៉ូលិសមិនបានរកឃើញភស្តុតាងនៃគ្រាប់កាំភ្លើងនៅកន្លែងកើតហតុឡើយ»។

ពាក់ព័ន្ធករណីនេះដែរ នាយករដ្ឋមន្ត្រីថៃ លោក Srettha Thavisin បានទៅដល់កន្លែងកើតហេតុ ហើយទទួលព័ត៌មានពីក្រុមអ្នកស៊ើបអង្កេត ដែលរាយការណ៍ថា តាមពិតអ្នកទាំង៦​ ផុតដង្ហើមរយៈពេល២៤ម៉ោងទៅហើយ មុនពេលរកឃើញ ហើយក្រុមការងារកំពុងធ្វើកោសល្យវិច័យ។

នាយករដ្ឋមន្ត្រីថៃ បានបញ្ជាក់ទៀត​ថា ប៉ូលិសត្រូវ​ស្វែង​រក​មូលហេតុ ព្រោះ​ការ​ស្លាប់​គឺ​ជាករណីឃាតកម្ម មិន​មែន​ការ​ធ្វើ​អត្តឃាត​ទេ ខណៈបើតាមការបញ្ជាក់ពីប៉ូលិស សារធាតុ​គួរ​ឲ្យ​សង្ស័យ និងDNA របស់​ជន​រង​គ្រោះ​ត្រូវ​បាន​រក​ឃើញ​នៅ​ក្នុង​ភេសជ្ជៈ​ ដែលកុម្ម៉ង់​នៅក្នុង​បន្ទប់នៃសណ្ឋាគារនោះ​។

គួរបញ្ជាក់ដែរថា ជនរងគ្រោះទាំង៦ គឺសុទ្ធសឹងជាជនជាតិវៀតណាម ប៉ុន្តែមាន២នាក់កាន់ ​Passport អាម៉េរិក។ ពួកគេបាន Check in បន្ទប់ក្នុងសណ្ឋាគារ Grand Hyatt Erawan ពីរពេល និងពីរបន្ទប់ផ្សេងគ្នា គឺនៅថ្ងៃសៅរ៍ និងថ្ងៃអាទិត្យ ប៉ុន្តែសាកសពត្រូវបានរកឃើញនៅក្នុងបន្ទប់តែមួយផងដែរ៕