និស្សិតជ័យលាភីអាហារូបករណ៍នាយកសាលាសាកលវិទ្យាល័យវិទ្យាសាស្ត្រនយោបាយ និងនីតិសាស្ត្រភាគនិរតី (Southwest University of Political Science & Law) និងអាហារូបករណ៍អភិបាលក្រុងឆុងឈីង ទទួលអនុសាសន៍ផ្តាំផ្ញើល្អៗពីថ្នាក់ដឹកនាំក្រសួងសាធារណការ និងដឹកជញ្ជូន មុនចេញដំណើរទៅបន្តការសិក្សានៅប្រទេសចិន។

ក្នុងឱកាសនោះ ឯកឧត្តម ឈួន វិន រដ្ឋលេខាធិការក្រសួងសាធារណការ និងដឹកជញ្ជូន ក៏បានចែករំលែកអំពីបទពិសោធន៍ អនុសាសន៍ និងការអនុវត្តល្អៗ ដែលជាទស្សនទានដ៏មានតម្លៃបំផុតសម្រាប់និស្សិតយកទៅផ្សព្វផ្សាយវប្បធម៌ អរិយធម៌ និងការអភិវឌ្ឍរបស់ជាតិ ក្នុងគោលបំណងឱ្យពិភពលោកបានដឹងបានយល់អំពីប្រទេសកម្ពុជាកាន់តែច្បាស់។

ជាមួយគ្នានោះ ឯកឧត្តមរដ្ឋលេខាធិការ ក៏បានចូលរួមអបអរសាទរកោតសរសើរចំពោះនិស្សិតជ័យលាភីទាំងអស់ និងជំរុញលើកទឹកចិត្តឱ្យនិស្សិតទាំងអស់ផ្ដោតសំខាន់លើការខិតខំប្រឹងប្រែងរៀនសូត្រទាំងនៅក្នុងសាលា ទាំងការស្វែងយល់ចំណេះដឹងបន្ថែមពីមជ្ឈដ្ឋានខាងក្រៅឱ្យអស់ពីលទ្ធភាព និងសមត្ថភាពដែលខ្លួនមាន បង្កើតមិត្តភាពរក្សាទំនាក់ទំនងល្អ ជាពិសេសថែរក្សាសុខភាពឱ្យបានល្អ ដើម្បីទទួលបានលទ្ធផលល្អប្រសើរក្លាយជាទំពាំងដ៏ល្អក្នុងការចូលរួមកសាងប្រទេសជាតិជាមួយរាជរដ្ឋាភិបាលនៅពេលវិលត្រឡប់មកមាតុប្រទេសវិញ។

សូមជម្រាបជូនថា ក្រុមនិស្សិតដែលទៅបន្តការសិក្សានៅប្រទេសចិន សម្រាប់ឆ្នាំសិក្សា ២០២៤-២០២៦ នឹងសិក្សាកម្រិតថ្នាក់អនុបណ្ឌិត ទៅលើជំនាញច្បាប់ នៅសាកលវិទ្យាល័យវិទ្យាសាស្ត្រ នយោបាយ និងនីតិសាស្ត្រភាគនីរតី ដោយគ្រោងចេញដំណើរនៅសប្តាហ៍ទី១ នៃកញ្ញា ឆ្នាំ២០២៤ នេះ៕