ជនជាតិវៀតណាម២នាក់ត្រូវបានកម្លាំងនគរបាលអន្តោប្រវេសន៍ នៃប៉ុស្តិ៍គរបាលច្រកទ្វារព្រំដែនអន្តរជាតិ ត្រពាំងក្រៀល ឃាត់ខ្លួនកាលពីថ្ងៃទី០៤ខែកញ្ញា ឆ្នាំ២០២៤ ខណៈត្រួតពិនិត្យឆែកឆេរ លើរថយន្តដឹកអ្នកដំណើរពីប្រទេសឡាវ មកប្រទេសកម្ពុជា ១គ្រឿង តាមច្រកទ្វារព្រំដែនអន្តរជាតិត្រពាំងក្រៀល ប្រទះឃើញម្សៅក្រាមពណ៌សថ្លា និងថ្នាំគ្រាប់មួយចំនួន។

មន្ត្រីនគរបាលអន្តោប្រវេសន៍ បានឲ្យដឹងថា កាលពីម្សិលមិញនេះមានរថយន្តក្រុងចំណុះ៤៥កៅអីពាក់ស្លាកលេខឡាវ 7979 ដឹកអ្នកដំណើរពីប្រទេសឡាវ មកប្រទេសកម្ពុជាត្រូវបានរកឃើញថាមានផ្ទុកម្សៅក្រាមពណ៌សថ្លា និងថ្នាំគ្រាប់មួយចំនួន នៅក្រោមកៅអីអង្គុយផ្នែកខាងក្រោយ។ ថ្នាំញៀនទាំងនោះរួមមាន ២៧ដុំធំ ជាប្រភេទក្រាមពណ៌សថ្លា សង្ស័យជាសារធាតុញៀន និងប្រភេទថ្នាំគ្រាប់ពណ៌បៃតង (សង្ស័យជាប្រភេទថ្នាំគ្រវី), ១០ដុំធំ ជាប្រភេទម្សៅ សង្ស័យជាសារធាតុញៀនប្រភេទហេរ៉ូអ៊ីន, គ្រាប់ក្រហមតូចៗ ៤៦៥គ្រាប់ សង្ស័យជាសារធាតុញៀនប្រភេទថ្នាំយ៉ាម៉ា និងក្រាមពណ៌សថ្លា ១កញ្ចប់តូច។ ក្នុងការត្រួពិនិត្យនេះដែរ ក៏បានឃាត់ខ្លួនជនជាតិវៀតណាម ២នាក់ផងដែរ។

គួរបញ្ជាក់ដែរថាបន្ទាប់ពីមានការសង្ស័យ ប៉ុស្តិ៍នគរបាលច្រកទ្វារ បានសុំកិច្ចសហការជាមួយកម្លាំងសមត្ថកិច្ចការិយាល័យទំនាក់ទំនងព្រំដែន (BLO) និងសមត្ថកិច្ចមូលដ្ឋានដែលពាក់ព័ន្ធ ដើម្បីសហ ការត្រួតពិនិត្យបន្ថែម និងបានបញ្ជូនបន្តទៅឲ្យស្នងការដ្ឋាននគរបាលខេត្តស្ទឹងត្រែង អនុវត្តនីតិវិធីបន្ត។ ទាក់ទិនចំនួនសរុបប៉ុន្មាននោះនៅមិនទាន់ដឹងពិតប្រាកដនៅឡើយទេដោយរង់ចាំបន្តនីតិវិធីធ្វើតេស្តរកសារធាតុញៀន និងថ្លឹងទម្ងន់សុទ្ធទើបច្បាស់លាស់៕