អនុប្រធានគណៈកម្មការអចិន្រ្ដៃយ៍នៃសភាតំណាងប្រជាជនក្រុងសៀងហៃ លោកជំទាវ ចុង មីង លើកឡើងថា លោកជំទាវមកកម្ពុជានាពេលនេះ ក្នុងគោលបំណងកៀរគរបន្ថែមសហគ្រាសកម្ពុជាឱ្យទៅចូលរួមពិព័រណ៍ពាណិជ្ជកម្មនាំចូលលើកទី៧ ពីថ្ងៃទី ៥-១០ ខែវិច្ឆិកា ឆ្នាំ២០២៤ នៅទីក្រុងសៀងហៃ។ថ្លែងក្នុងជំនួបជាមួយ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភាកម្ពុជា នៅព្រឹកថ្ងៃទី៣ ខែកញ្ញា ឆ្នាំ២០២៤ លោជំទាវបញ្ជាក់ថា ការចូលរួមរបស់សហគ្រាសកម្ពុជាគឺ ធ្វើយ៉ាងណានាំយកនូវផលិតផលល្អៗ និងសេវាកម្មល្អៗពីកម្ពុជាទៅទីក្រុងសៀងហៃ ក៏ដូចជាប្រទេសចិនផងដែរ។លោកជំទាវ ចុង មីង បានរៀបរាប់លម្អិតជម្រាបជូនសម្តេចប្រធានរដ្ឋសភាពីសក្តានុពល និងការងាររដ្ឋបាលរបស់ក្រុងសៀងហៃដោយបានគូសបញ្ជាក់ថា ក្រុងសៀងហៃជាមជ្ឈមណ្ឌលនយោបាយ សេដ្ឋកិច្ច ពាណិជ្ជកម្ម និងហិរញ្ញវត្ថុដ៏សំខាន់របស់ប្រទេសចិន។ ហើយពិព័រណ៍ពាណិជ្ជកម្មនាំចូលនេះបានរៀបចំឡើង ៦ លើកមកហើយ ចាប់តាំងពីឆ្នាំ២០១៨ ហើយកន្លងមកមានសហគ្រាសកម្ពុជាចំនួន ៣៧ បានចូលរួម។ទន្ទឹមនោះ លោកជំទាវ ចុង មីង បានអបអរសាទរចំពោះការរីកចម្រើនគ្រប់វិស័យរបស់កម្ពុជា ក្នុងនោះ លោកជំទាវមានមោទនភាពចំពោះសមិទ្ធផល ដែលកើតចេញពីគំនិតផ្តួចផ្តើមខ្សែក្រវ៉ាត់ និងផ្លូវ ខណៈសមិទ្ធផលនេះ មិនត្រឹមផ្តល់នូវសុខដុមនីយកម្មដល់ប្រជាពលរដ្ឋប៉ុណ្ណោះទេ តែបានធ្វើឱ្យចំណងមិត្តភាពកម្ពុជា-ចិនមាន លក្ខណៈរស់រវើកថែមទៀតផង។ លោកជំទាវបានបញ្ជាក់ថា ប្រទេសចិន និងកម្ពុជា គឺជាមិត្តដែលបានរួមសុខទុក្ខជាមួយគ្នាយ៉ាងស្មោះស្ម័គ្រ ជឿទុកចិត្តគ្នា ហើយភាគីចិនបានផ្តោតការយកចិត្តទុកដាក់ខ្ពស់ចំពោះវិវត្តនៃទំនាក់ទំនងប្រទេសទាំងពីរ និងត្រៀមលក្ខណៈជាស្រេចក្នុងការអនុវត្តនូវកិច្ចការ ដែលថ្នាក់ដឹកនាំប្រទេសទំាងពីរបានឯកភាពគ្នាកន្លងមក ដើម្បីជំរុញកសាងជោគវាសនារួមកម្ពុជា-ចិន ក្នុងសម័យទំនើប ឱ្យកាន់តែស៊ីជម្រៅ និងជាក់ច្បាស់៕

សម្របសម្រួលអត្ថបទដោយ៖ ផល្លីកា