សម្រាប់ព្រឹត្តិការណ៍ព័ត៌មានថ្មីៗប្រចាំថ្ងៃនេះរួមមាន៖

១. ព្រះករុណា ព្រះមហាក្សត្រ ទ្រង់នឹងស្តេចយាងទៅចូលរួមកិច្ចប្រជុំកំពូលហ្វ្រង់កូហ្វូនី លើកទី១៩ នៅសាធារណរដ្ឋបារាំង 

តបតាមការសុំយាងរបស់ ឯកឧត្តមប្រធានាធិបតី នៃសាធារណរដ្ឋបារាំង ព្រះករុណាជាអម្ចាស់ជីវិតលើត្បូង ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីសក្ការៈដ៏ខ្ពង់ខ្ពស់បំផុត ព្រះអង្គនឹងស្តេចយាងទៅចូលរួមកិច្ចប្រជុំកំពូលហ្វ្រង់កូហ្វូនី លើកទី១៩ នៅសាធារណរដ្ឋបារាំង ពីថ្ងៃទី៤ដល់ថ្ងៃទី៥ ខែតុលា ឆ្នាំ២០២៤ ខាងមុខនេះ។

២. ជោគជ័យនៃព្រឹត្តិការណ៍ Gumball 3000 ផ្ដល់អត្ថប្រយោជន៍សំខាន់៣សម្រាប់កម្ពុជា

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានសម្ដែងអបអរសាទរ និងវាយតម្លៃខ្ពស់ចំពោះជោគជ័យ និងកិច្ចសហការល្អប្រសើរនៃរៀបចំព្រឹត្តិការណ៍ Gumball 3000 នេះ ព្រមទាំងបានថ្លែងអំណរគុណដល់គ្រប់ភាគីពាក់ព័ន្ធដែលបានរួមចំណែករៀបចំព្រឹត្តិការណ៍នេះដោយរលូន និងជោគជ័យ។

៣. អភិបាលខេត្តកែបតែងតែណែនាំអាជីវករកុំឲ្យលក់ម្ហូបអាហារថ្លៃ តែមួយចំនួនតូចរឹងរូសនិងឆ្លៀតឱកាស​លក់​តម្លើង​ថ្លៃ

ក្រោយមានមហាជននៅលើបណ្តាញសង្គមផ្ទុះការវែកញែកជាច្រើនហូរហែ ទៅលើតម្លៃម្ហូបអាហារឡើងថ្លៃ និងពិបាកទទួលយក ឯកឧត្តម សោម ពិសិដ្ឋ អភិបាលនៃគណៈអភិបាលខេត្តកែបបានបង្ហោះសារនៅលើគណនីបណ្តាញសង្គមផ្ទាល់ខ្លួននៅថ្ងៃទី៣០ ខែកញ្ញានេះដោយអះអាងថា កន្លងមកអាជ្ញាធរ តែងតែហៅអាជីវករមកណែនាំកុំឱ្យលក់ម្ហូបអាហារថ្លៃ ក៏ប៉ុន្តែអាជីវករមួយចំនួនតូចនៅតែរឹងរូស និងឆ្លៀតឱកាស​លក់​តម្លើង​ថ្លៃ​ ធ្វើឱ្យប៉ះពាល់ដល់អាជីវករត្រឹមត្រូវដែលលក់ក្នុងតម្លៃសមរម្យ។

៤. ពិតជាប្រពៃណាស់! តារាកំប្លែង នាយ ពាក់មី ផ្ដើមគំនិតរៀបចំកម្មវិធីវេចនំអន្សមក្នុងស្មារតីលើកតម្កើងនំខ្មែរ

តារាកំប្លែង នាយ ពាក់មី បានផ្ដើមគំនិត និងរៀបចំកម្មវិធីវេចនំអន្សមចំនួន ២០២៤នំ ក្នុងស្មារតីរួបរួមលើកតម្កើងនំខ្មែរ ដែលសកម្មភាពនេះបានធ្វើឲ្យមហាជនអ្នកលេងបណ្ដាញសង្គមឃើញហើយគាំទ្រ និងស្ញើចសរសើរ ព្រមទាំងបានចែករំលែកព្រោងព្រាតតែម្ដង។

៥. អាជា្ញធរអាម៉េរិក ពន្លឿនការជួយសង្គ្រោះទៅកាន់រដ្ឋ North Carolina ក្រោយព្យុះសង្ឃរា Helene

មន្ត្រីរដ្ឋ North Carolina បានសន្យានៅថ្ងៃចន្ទនេះថានឹងព្យាយាមបញ្ជូនការសង្គ្រោះ ដូចជាទឹកស្អាត និងសម្ភារៈផ្គត់ផ្គង់ផ្សេងៗបន្ថែមទៀតទៅកាន់តំបន់ដែលរងគ្រោះ ក្រោយទទួលរងការវាយប្រហារយ៉ាងខ្លាំងក្លាពីឥទ្ធិពលព្យុះសង្ឃរាHelene ដោយបានបន្សល់ទុកនូវការបំផ្លិចបំផ្លាញនៅទូទាំងភាគអាគ្នេយ៍នៃសហរដ្ឋអាមេរិក។

៦.​មិននឹកស្មានដល់! អតីតតារាចម្រៀងរ៉េប P.Diddy ជាមនុស្សរោគចិត្តហ៊ានប្រព្រឹត្តអំពើដ៏ស្មោកគ្រោកបែបនេះ

P.Diddy គឺជាអតីតតារាចម្រៀងរ៉េបជើងចាស់មួយរូបក្នុងវិស័យ HipHop និងជាអ្នកជំនួញដ៏មានឥទ្ធិពលម្នាក់នៅសហរដ្ឋអាមេរិក ដោយនាពេលថ្មីៗតារាចម្រៀងរ៉េបជើងចាស់មួយរូបនេះកំពុងទាក់ទាញបណ្តាលចិត្តមហាជនឲ្យចាប់អារម្មណ៍ជាខ្លាំងម្តងទៀត ពាក់ព័ន្ធទៅនឹងឧក្រិដ្ឋកម្មដ៏សាហាវព្រៃផ្សៃ នឹកស្មានមិនដល់ទើបបានបែកធ្លាយក្រោយពេលលោកត្រូវបានភ្នាក់ងារស៊ើបអង្កេតសន្តិសុខចាប់ខ្លួនកាលពីថ្ងៃទី១៦ ខែកញ្ញា ឆ្នាំ២០២៤ នៅសណ្ឋាគារ Park Hyatt New York ស្ថិតទីក្រុង Manhattan ទីក្រុងញូវយ៉ក ​ជុំវិញ​ករណី​ជួញដូរ​ផ្លូវភេទ។ 

៧. អ្នកនាំពាក្យក្រសួងមហាផ្ទៃអំពាវនាវដល់រថយន្តដឹកទំនិញធំៗផ្អាកចរាចរណ៍ ដើម្បីកាត់បន្ថយការកកស្ទះ និងហានិភ័យជាយថាហេតុក្នុងឱកាសបុណ្យភ្ជុំបិណ្ឌនេះ

ដើម្បីលើកកម្ពស់សុវត្ថិភាពចរាចរណ៍ ពោលគឺកាត់បន្ថយការកកស្ទះ និងគ្រោះថ្នាក់ចរាចរណ៍ជាយថាហេតុនាឱកាសពិធីបុណ្យភ្ជុំបិណ្ឌប្រពៃណីជាតិនេះ អ្នកនាំពាក្យរងក្រសួងមហាផ្ទៃ អំពាវនាវដោយទទូចដល់បណ្ដាក្រុមហ៊ុនដឹកជញ្ជូន ជាពិសេសរថយន្តដឹកទំនិញធំៗ គប្បីសម្រាកមួយរយៈពេលនេះសិនជាការប្រសើរ ដើម្បីបញ្ចៀសការកកស្ទះ និងគ្រោះថ្នាក់ជាយថាហេតុកើតឡើង។

៨. សម្ដេចធិបតីនាយករដ្ឋមន្ត្រីកម្ពុជានឹងមានវត្តមានដ៏ខ្ពង់ខ្ពស់ចូលរួមរត់ក្នុងទិវារត់ប្រណាំងអន្តរជាតិពាក់កណ្ដាលម៉ារ៉ាតុង

សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជានឹងមានវត្តមានដ៏ខ្ពង់ខ្ពស់ចូលរួមរត់ក្នុងទិវារត់ប្រណាំងអន្តរជាតិពាក់កណ្ដាលម៉ារ៉ាតុង ខណៈដែលរយៈពេល២៩ឆ្នាំមកនេះ ទិវារត់ប្រណាំងអន្តរជាតិពាក់កណ្ដាលម៉ារ៉ាតុង ត្រូវបានបង្កើតឡើង និងតែងតែប្រារព្ធនៅខេត្តសៀមរាបទឹកដីអង្គរ។

៩. កម្ពស់ទឹកជំនន់ឆ្នាំនេះ ធ្វើឲ្យប៉ះពាល់ដល់ស្រុកនៃខេត្តកំពង់ចាមចំនួន៥ នៅតាមបណ្ដោយដងទន្លេមេគង្គ

អភិបាលខេត្តកំពង់ចាម និងជាប្រធានគណៈកម្មាធិការគ្រប់គ្រងគ្រោះមហន្តរាយខេត្ត ឯកឧត្ដម អ៊ុន ចាន់ដា បានឲ្យដឹងថា នាប៉ុន្មានថ្ងៃនេះ ទឹកជំនន់ទន្លេមេគង្គ បានហក់ឡើងកម្ពស់ ១៤.៣០ម៉ែត្រ បណ្ដាលឲ្យប៉ះពាល់ ដល់ស្រុកនៃខេត្តកំពង់ចាម ចំនួន ៥ នៅតាមបណ្ដោយដងទន្លេមេគង្គគឺ ស្រុកស្ទឹងត្រង់ កំពង់សៀម កងមាស កោះសូទិន និងស្រុកស្រីសន្ធរ។

១០. ខេមបូឌានព្រីមៀរលីគ ចេញសេចក្តីថ្លែងការណ៍ក្រោយមានរឿងចម្រូងចម្រាសពីអាជ្ញាកណ្ដាល និងគ្រូជំនួយក្នុងប្រកួតពានរង្វាន់លីគកំពូលកម្ពុជា

នាពេលថ្មីៗនេះក្រុមហ៊ុន ខេមបូឌានព្រីមៀរលីគ (Cambodian Premier League) បានចេញសេចក្តីថ្លែងការណ៍មួយ បន្ទាប់ពីមានរឿងចម្រូងចម្រាសនៃការការកាត់សេចក្តីរបស់អាជ្ញាកណ្ដាល និងមានគ្រូជំនួយម្នាក់បានប្រើពាក្យសម្តីមិនសមរម្យ នៅក្នុងការប្រកួតពានរង្វាន់លីគកំពូលកម្ពុជារដូវកាលឆ្នាំ២០២៤/២៥ សប្ភាហ៍ទី៧ រវាងសមាគមកីឡាបាល់ទាត់កងយោធពលខេមរភូមិន្ទ ជាមួយក្លិបបាល់ទាត់វិសាខា នៅកីឡដ្ឋានTiffy Army Staduim កាលពីល្ងាចថ្ងៃទី២៨ ខែកញ្ញា ឆ្នាំ២០២៤ ។