សម្រាប់ព្រឹត្តិការណ៍ព័ត៌មានថ្មីៗប្រចាំថ្ងៃនេះរួមមាន៖

១.​ ព្រះករុណា ព្រះមហាក្សត្រកម្ពុជា សព្វព្រះរាជហឫទ័យនឹងយាងចូលរួមកិច្ចប្រជុំកំពូលហ្វ្រង់កូហ្វូនីលើកទី១៩ នៅ Villers-Cotterêts និងនៅទីក្រុងប៉ារីស

តបតាមការសូមយាងរបស់ ឯកឧត្តម Emmanuel Macron ប្រធានាធិបតីនៃសាធារណរដ្ឋបារាំង ព្រះករុណាជាអម្ចាស់ជីវិតលើត្បូងជាទីគោរពសក្ការៈដ៏ខ្ពង់ខ្ពស់បំផុត ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ព្រះអង្គបានសព្វព្រះរាជហឫទ័យ នឹងយាងចូលរួមកិច្ចប្រជុំកំពូលហ្វ្រង់កូហ្វូនីលើកទី១៩។

២. សម្តេចធិបតីកោតសរសើរចំពោះកញ្ញា កុយ អេនណា ដែលបានបំផុសស្មារតីឲ្យពលរដ្ឋចូលរួមការពារធនធានធម្មជាតិ

សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានមានប្រសាសន៍កោតសរសើរ និងអរគុណដល់ក្រុមការងារ ក៏ដូចជាកញ្ញា កុយ អេនណា ដែលបានខិតខំរៀបចំតុបតែងខ្លួនជា ”ព្រះម៉ែធម្មជាតិ” ដើម្បីបំផុសស្មារតីរបស់ប្រជាពលរដ្ឋក្នុងការចូលរួមការពារធនធានធម្មជាតិ។

៣. ឥទ្ធិពលព្យុះសង្ឃរា នឹងធ្វើឲ្យទូទាំងប្រទេសកម្ពុជារងសម្ពាធទាប មានភ្លៀងធ្លាក់គ្របដណ្តប់ទូទាំងប្រទេស

ព្យុះទី១៧ ឈ្មោះ ជីប៊ី និងព្យុះទី១៨ ឈ្មោះ ក្រាតធន បានវិវត្តទៅជាព្យុះសង្ឃរា កើតនៅសមុទ្រចិនខាងត្បូង និងបន្តមានឥទ្ធិពលលើខ្យល់មូសុងនិរតី ដែលបក់លើសមុទ្រអានដាមម៉ែន(Andaman Sea) ឈូងសមុទ្រថៃ ខណៈសម្ពាធទាបនៅបន្តគ្របដណ្ដប់លើភាគកណ្តាលនៃអាងទន្លេមេគង្គ និងលើព្រះរាជាណាចក្រកម្ពុជា ដែលធ្វើឱ្យមានភ្លៀងធ្លាក់គ្របដណ្តប់ទូទាំងប្រទេស។

៤. លោក Fumio Kishida លាលែងពីតំណែង ក្រោយកាន់អំណាចជានាយករដ្ឋមន្រ្តី៣ឆ្នាំចាប់ពីឆ្នាំ២០២១

នៅថ្ងៃអង្គារនេះនាយករដ្ឋមន្ត្រីជប៉ុនលោក Fumio Kishida បានសម្រេចលាលែងតំណែងជាផ្លូវការពី គណៈរដ្ឋមន្ត្រីរបស់លោក ដោយបើកផ្លូវឱ្យអ្នកស្នងតំណែងក្នុងជួរគណបក្សរបស់លោកបន្ត ដែលមានឈ្មោះថា Shigeru Ishiba ចូលកាន់តំណែងបន្ត។ 

៥. គូស្នេហ៍តារាល្បីតាមអ៊ីនធឺណិតត្រូវចាប់ខ្លួនពីបទឆបោក លក់មាសមិនសុទ្ធ 

អាជ្ញាធរការពារអ្នកប្រើប្រាស់ថៃបានចាប់ខ្លួនគូស្នេហ៍តារាអនឡាញមួយគូ ដោយចោទប្រកាន់ពួកគេពីបទក្លែងបន្លំ និងផ្សព្វផ្សាយការផ្សាយពាណិជ្ជកម្មមិនពិតដែលអាចប៉ះពាល់ដល់អ្នកប្រើប្រាស់។

៦. មានសិស្សសាលាស្លាប់ និងរបួសក្នុងករណីឆេះរថយន្តក្រុងសាលារៀននៅប្រទេសថៃ

រថយន្តក្រុងដឹកជញ្ជូនសិស្សសាលាមួយត្រូវបានឆាបឆេះយ៉ាងសន្ធោរសន្ធៅ នៅខេត្ត Uthai Thani ដែលបានបង្កឲ្យសិស្សសាលាវ័យក្មេងមួយចំនួនបានស្លាប់នៅក្នុងអណ្តាតភ្លើង និងខ្លះរងរបួស។ នេះបើតាមការរាយការណ៍របស់ វិទ្យុប៉ូលីសចរាចរណ៍ របស់ប្រទេសថៃ។

៧. លោក Biden នឹងធ្វើដំណើរទៅពិនិត្យទីក្រុងដែលរងផលប៉ះពាល់ក្រោយព្យុះសង្ឃរា Helene បោកបក់ដោយខ្លួនលោកផ្ទាល់

ប្រធានាធិបតីសហរដ្ឋអាមេរិក លោក Joe Biden បាននិយាយនៅថ្ងៃចន្ទ ម៉ោងនៅក្នុងស្រុកថា លោកនឹងធ្វើដំណើរទៅកាន់រដ្ឋ North Carolina នៅថ្ងៃពុធ ដើម្បីពិនិត្យមើលពីស្ថានភាព និងធ្វើបទសម្ភាសន៍សង្ខេបស្ទាបស្ទង់ពីលើអាកាសក្រោយពីទីក្រុង Asheville ត្រូវបានរងការបំផ្លិចបំផ្លាញយ៉ាងធ្ងន់ធ្ងរដោយព្យុះសង្ឃរាHelene។   

៨. រយៈពេល៩ខែ ឆ្នាំ២០២៤ មានភ្ញៀវទេសចរបរទេសជាង ៧០ម៉ឺននាក់ បានទិញសំបុត្រចូលទស្សនារមណីយដ្ឋានអង្គរ

រយៈពេល ៩ខែ ឆ្នាំ២០២៤ មាន​ភ្ញៀវទេសចរ​បរទេស​ជាង ៧០ម៉ឺននាក់ បានទិញសំបុត្រ​ចូលទស្សនារមណី​យដ្ឋាន​អង្គរ ដោយគិតជាទឹក​ប្រាក់​​​ប្រមាណជាង ៣២លានដុល្លារអាមេរិក ខណៈចំនួននេះកើនឡើង ៣១,៣៦ភាគរយ បើប្រៀបធៀបរយៈពេលដូចគ្នានៅឆ្នាំ ២០២៣។

៩. ពេជ្រ ថៃ ​បញ្ជាក់មូលហេតុក្រោយ​រង​ការ​រិះគន់រឿង​ឈរ​ច្រៀង​មុខ​ព្រះសង្ឃ​ក្នុងថ្ងៃកាន់បិណ្ឌ

កាលពីពេលថ្មីៗនេះមានមហាជន​បាននាំ​គ្នា​រិះគន់​យ៉ាង​ខ្លាំង ក្រោយ​​ឃើញ​មានការ​បង្ហោះ​វី​ដេ​អូ​តាម​បណ្តាញ​សង្គម​ដោយ​បង្ហាញ​ពី​សកម្មភាព​របស់ម្ចាស់​ជ័យ​លា​ភី​ The Voice Kid រដូវកាលទី១ លោក ពេជ្រ ថៃ បានឈរ​បកស្រាយ​ចម្រៀង​មួយ​បទ​នៅ​មុខ​ព្រះសង្ឃ និង​ពុទ្ធបរិស័ទ​នៅ​ក្នុង​វត្ត​មួយ ​នា​ឱកាសថ្ងៃ​កាន់បិណ្ឌ នៃពិធីបុណ្យ​ភ្ជុំបិណ្ឌ​ប្រពៃណីខ្មែរ ដែលមហាជន​បាន​ចាត់​ទុក​សកម្មភាព​របស់​តារាចម្រៀង​រូប​នេះ​មិន​សមរម្យ និង​ធ្វើឲ្យខូច​សាសនា​ដែល​ប្រជាពលរដ្ឋ​គោរព​បូជា។

១០. តើធ្វើយ៉ាងណាទើបដឹងថាប័ណ្ណសមាជិក ប.ស.ស. មានសុពលភាពអាចប្រើប្រាស់សេវានៅតាមមូលដ្ឋានសុខាភិបាលដៃគូ ប.ស.ស. បាន?

សម្រាប់សមាជិក ប.ស.ស. ដែលកំពុងបម្រើការងារនៅតាមក្រុមហ៊ុន សហគ្រាស គ្រឹះស្ថាន និងបានធ្វើប័ណ្ណ ប.ស.ស. រួចរាល់ ដើម្បីអាចប្រើប្រាស់សេវានៅតាមមូលដ្ឋានសុខាភិបាលដៃគូ ប.ស.ស. បាន គឺត្រូវបំពេញនូវលក្ខខណ្ឌមួយចំនួន។