សម្រាប់ព្រឹត្តិការណ៍ព័ត៌មានថ្មីៗប្រចាំថ្ងៃនេះរួមមាន៖

១. ព្រះមហាក្សត្រ ស្តេចយាងបំពេញព្រះរាជទស្សនកិច្ចផ្លូវរដ្ឋនៅសាធារណរដ្ឋសង្គមនិយមវៀតណាម

ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត នៃព្រះរាជាណាចក្រកម្ពុជា នឹងយាងទៅបំពេញព្រះរាជទស្សនកិច្ចផ្លូវរដ្ឋ នៅសាធារណរដ្ឋ សង្គមនិយមវៀតណាម ពីថ្ងៃទី២៨-២៩ ខែវិច្ឆិកា ឆ្នាំ២០២៤ តបតាមការអញ្ជើញរបស់ ឯកឧត្តម លឿង គឿង ប្រធានាធិបតីនៃសាធារណរដ្ឋសង្គមនិយមវៀតណាម។

២. ក្មេងស្រីដែលចាញ់បោកមេខ្យល់យកទៅប្រទេសចិន បានមកដល់កម្ពុជាវិញហើយ

ក្មេងស្រីដែលចាញ់បោកមេខ្យល់នាំយកទៅប្រទេសចិន បានវិលត្រឡប់មកដល់កម្ពុជាវិញហើយ ក្រោមការស្នើសុំអន្តរាគមន៍ឲ្យជួយកាលពីពេលកន្លងមក ដោយនាថ្ងៃទី២៨ ខែវិច្ឆិកា ឆ្នាំ២០២៤ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានទទួលជួបក្មេងស្រីខាងលើនៅទីស្តីការក្រសួងមហាផ្ទៃ

៣. អស្ចារ្យណាស់! MV បទ”សែកមន្ត” របស់ឧកញ៉ា ព្រាប សុវត្ថិ មានចាប៉ីខ្មែរជាង ១០០ដើមប្រគុំ

ឧកញ៉ា ព្រាប សុវត្ថិ តារាចម្រៀងប្រចាំផលិតកម្ម Galaxy navatra បានបង្ហាញនូវMV បទថ្មី «សែកមន្ត» ធ្វើឲ្យបណ្ដាអ្នកគាំទ្រមានការភ្ញាក់ផ្អើល និងប្លែកអារម្មណ៍ដោយមានការរួមបញ្ចូលនូវចាប៉ីខ្មែរប្រមាណជាង ១០០ដើមប្រគំជាភ្លេងបុរាណលាយសម័យកាន់តែធ្វើឱ្យបទចម្រៀងមួយបទនេះមានភាពទាក់ទាញ និងពិរោះ ក៏ដូចជាដើម្បីអបអរសាទរគម្រប់ខួប៨ឆ្នាំនៃការចុះបញ្ជីបេតិកភណ្ឌវប្បធម៌អរូបីនៃមនុស្សជាតិនៅក្នុងថ្ងៃទី៣០ ខែវិច្ឆិកា ឆ្នាំ ២០២៤ ខាងមុខនេះ។

៤. កីឡាចំនួន ១០ប្រភេទនឹងរៀបចំឲ្យប្រកួតក្នុងពិធីបុណ្យសមុទ្រលើកទី១១ នៅខេត្តកំពត

អនុគណៈកម្មការរៀបចំព្រឹត្តិការណ៍កីឡាលើទឹក និងកីឡាលើឆ្នេរ បានសម្រេចដាក់បញ្ចូលកីឡាចំនួន ១០ប្រភេទដើម្បីប្រកួត និងបង្ហាញនៅក្នុងពិធីបុណ្យសមុទ្រលើកទី១១ ជុំទី៣ នៅក្នុងខេត្តកំពត។

៥. អូស្ត្រាលី ផ្តល់ជំនួយមនុស្សធម៌បន្ថែមដល់ ស៊ូដង់ 

រដ្ឋាភិបាលអូស្ត្រាលី បានប្តេជ្ញាផ្តល់ជំនួយមនុស្សធម៌ចំនួន ១១.០៤លានដុល្លារអាមេរិក ដើម្បីដោះស្រាយគ្រោះទុរភិក្ស និង តម្រូវការមនុស្សធម៌នៅក្នុងប្រទេសស៊ូដង់ ចំពេលមានសង្គ្រាមស៊ីវិលដែលកំពុងបន្តនៅក្នុងប្រទេស។

៦. មន្ត្រីគយហុងកុងចាប់ខ្លួនមនុស្សប្រុស-ស្រី៥នាក់ ជាប់ពាក់ព័ន្ធនឹងករណីនាំចូលនិងចែកចាយសារធាតុខុសច្បាប់ Space Oil  

គ្រូបង្រៀនសាលាបឋមសិក្សាហុងកុងម្នាក់ ក្នុងចំណោមមនុស្ស ០៧ នាក់ដែលត្រូវគេចាប់ខ្លួននៅក្នុងការបង្ក្រាបលើការនាំចូល និងចែកចាយដោយខុសច្បាប់នៃឱសថដែលទើបនឹងចេញថ្មីដែលគេស្គាល់ថា "ប្រេងអវកាស" ឬ ម្សៅ etomidate ដោយមន្ត្រីគយរឹបអូសបានថ្នាំស្ពឹកដែលអាចផលិតក្នុងទំហំទឹកប្រាក់ជាង១៧លានដុល្លារហុងកុង ស្មើនឹងប្រមាណជា២.២លានដុល្លារអាម៉េរិក។

៧. អបអរសាទរ ខួបលើកទី៦ ល្ខោនខោលវត្តស្វាយអណ្ដែត ត្រូវបានចុះក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិ 

ល្ខោនខោលវត្តស្វាយអណ្តែត ត្រូវបានចុះក្នុងបញ្ជីបេតិកភណ្ឌពិភពលោកជាបេតិកភណ្ឌតំណាងឲ្យល្ខោនខោលនានា ក្នុងប្រទេសកម្ពុជាទាំងមូល នៅថ្ងៃទី២៨ ខែវិច្ឆិកា ឆ្នាំ២០១៨។

៨. កម្មវិធី Miss Planet International 2024 បញ្ចប់ទៅ ទទួលបានការរិះគន់នូវចំនុចខ្វះខាតផ្សេងៗ 

ក្រោយពីការប្រកួតវគ្គផ្តាច់ព្រ័តកម្មវិធី Miss Planet International 2024 បញ្ចប់ទៅដោយរលូតដោយរកឃើញម្ចាស់មកុដចំនួន២រូប គឺបវរកញ្ញា United Arab Emirates បានក្លាយជាម្ចាស់មកុដ Miss Planet International 2024 និង បវរកញ្ញា Indonesia ក្លាយជាម្ចាស់មកុដ Miss Angel Planet International 2024 ដែលនេះជាប្រវិត្តសាស្រ្តថ្មីមួយទៀតដែលមិនធ្លាប់មានក្នុងវិស័យបវរកញ្ញា។ 

៩. អ្នកនាំពាក្យរាជរដ្ឋាភិបាលចែករំលែកត្តាសំខាន់ៗដើម្បីក្លាយជាមូលធនមនុស្សនៅកម្ពុជា 

ឯកឧត្តម ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាល នៅព្រឹកមិញនេះបានធ្វើបាឋកថា នៅចំពោះមុខនិស្សិតសាកលវិទ្យាល័យកម្ពុជា ក្រោមប្រធានបទ «ការចូលរួមរបស់យុវជន ដើម្បីឆ្ពោះទៅសម្រេចចក្ខុវិស័យកម្ពុជាឆ្នាំ២០៥០» ដោយបញ្ជាក់យ៉ាងដូច្នេះថា «ដើម្បីក្លាយខ្លួនជាមូលធនមនុស្សពិតប្រាកដ អ្វីដែលក្មួយៗនិស្សិតត្រូវចងចាំ គឺត្រូវរៀនឱ្យលើសពីចេះ រហូតក្លាយជាអ្នកដែលមានទេពកោសល្យខ្ពស់ ជាមនុស្សពូកែ និងប៉ិនប្រសប់» ដូចសុភាសិតមួយពោលថា «ចេះ១០ មិនស្មើប្រសប់មួយ»។ 

១០. សហភាពអឺរ៉ុប និងរដ្ឋមន្ត្រីក្រសួងកសិកម្ម ធ្វើទស្សនកិច្ចរួមគ្នាទៅកាន់ចម្ការស្វាយចន្ទី និងម្រេច ដើម្បីជំរុញកំណើនខ្សែច្រវាក់ផលិតកម្ម និងឱកាសការងារ 

ប្រតិភូសហភាពអឺរ៉ុប ដែលក្នុងនោះរួមមាន ឯកអគ្គរដ្ឋទូតសហភាពអឺរ៉ុប អាល្លឺម៉ង់ និងសាធារណរដ្ឋឆេក តំណាងមកពីស្ថានទូតបារាំង ភ្នាក់ងារបារាំងសំរាប់ការអភិវឌ្ឍ (AFD) អាជ្ញាធរអភិវឌ្ឍន៍សហប្រតិបត្តិការស្វីស (SDC) និង អង្គការ GIZ រួមជាមួយឯកឧត្តម ឌិត ទីណា រដ្ឋមន្ត្រី ក្រសួង កសិកម្ម រុក្ខាប្រមាញ់ និងនេសាទ (MAFF) ចុះធ្វើទស្សនកិច្ចដល់ទីតាំងចម្ការផ្ទាល់ដើម្បីស្វែងយល់អំពីបញ្ហាប្រឈមនានា នៅថ្នាក់មូលដ្ឋានដែលកសិករនិងក្រុមកែច្នៃកំពុងជួបប្រទះលើការផលិតដំណាំដែលមានតម្លៃខ្ពស់ ជាពិសេសគ្រាប់ស្វាយចន្ទី និងម្រេច។