សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាលើកទឹកចិត្តដល់ប្រជាពលរដ្ឋបញ្ចប់ការវែកញែករឿងចាក់សាំងនៅខេត្តកំពតជាបន្តទៀត និងជម្រុញឲ្យមានការយោគយល់គ្នាខ្ពស់ចំពោះរឿងតិចតួចដែលបានកើតឡើងក្នុងសង្គម។

សម្តេចមហាបវរធិបតីនាយករដ្ឋមន្ត្រីមានប្រសាសន៍ថ្លែងបែបនេះក្នុងឱកាសអញ្ជើញជាអធិបតីក្នុងពិធីសម្ពោធដាក់ឱ្យប្រើប្រាស់ជាផ្លូវការកំពង់ផែទេសចរណ៍អន្តរជាតិកំពត ស្ថិតនៅក្នុងភូមិជុំគ្រៀល ឃុំជុំគ្រៀល ស្រុកទឹកឈូ ខេត្តកំពត នាព្រឹកថ្ងៃទី២១ ខែមេសា ឆ្នាំ២០២៥នេះ។

សូមជម្រាបជូនថា កាលពីថ្មីៗនេះមានករណីបុគ្គលិកចាក់សាំងនៅក្នុងស្ថានីយ៍ប្រេងឥន្ធនៈភីធីធីមួយកន្លែងនៅក្នុងខេត្តកំពត ក្រោយស្ត្រីម្នាក់ជាអតិថិជនបានថតពីសកម្មភាពបុគ្គលិកចាក់សាំងរឿងទារលុយបន្ថែម ១០០០រៀល លើអត្រាប្ដូរប្រាក់១ដុល្លារស្មើរនិង ៤ ០០០ រៀល ប៉ុន្តែស្ត្រីជាអតិថិជននោះបានតវ៉ា និងប្រកែកមិនព្រមឱ្យបុគ្គលិកនោះឡើយ ដែលរឿងនេះបានបង្កជាការភ្ញាក់ផ្អើល និងផ្ទុះការវែកញែកយ៉ាងច្រើនព្រោងព្រាតពីសំណាក់អ្នកនិយមលេងបណ្តាញសង្គម ដោយមានទាំងមតិវិជ្ជមាន និងអវិជ្ជមានមកកាន់បុគ្គលិកចាក់សាំងផង និងស្ត្រីជាអតិថិជនផង។ក្រោយពីមើលឃើញការវែកញែកឥតឈប់ឈរបែបនេះសម្តេចមហាបវរធិបតី ហ៊ុន ម៉ាណែត ក៏បានមានប្រសាសន៍លើកទឹកចិត្តដល់ប្រជាពលរដ្ឋដែលនិយមលេងបណ្តាញទំនាក់ទំនងសង្គមឲ្យបញ្ចប់ការវែកញែករឿងចាក់សាំងនេះជាបន្តទៀត និងជម្រុញឲ្យមានការយោគយល់គ្នាខ្ពស់ចំពោះរឿងតិចតួចដែលបានកើតឡើងក្នុងសង្គម។ សម្តេចមហាបវរធិបតីនាយករដ្ឋមន្ត្រីបានបញ្ជាក់ថា «រឿងតិចតួចបែបនេះមិនគួរឲ្យមានរឿងសោះ ប្រសិនជាយើងចេះយោគយល់គ្នា ហើយចេះនិយាយគ្នាត្រង់ចំណុចខ្វះខាតណាមួយ»។

ទន្ទឹមនឹងនោះសម្តេចមហាបវរធិបតីនាយករដ្ឋមន្ត្រី ក៏បានអំពាវនាវឲ្យពលរដ្ឋទាំងអស់ងាកមកសាទរជាមួយពិធីបុណ្យចូលឆ្នាំថ្មីប្រពៃណីជាតិខ្មែរវិញ ដែលបានរៀបចំឡើងដោយភាពសប្បាយរីករាយ និងគ្មានបញ្ហា ហើយត្រូវចាប់ផ្តើមឆ្នាំថ្មីដោយរឿងល្អៗដើម្បីឲ្យប្រទេសជាតិកាន់តែវិវឌ្ឍន៍ទៅមុខជាបន្តទៀត៕