ឯកឧត្តម ឌី វិជ្ជា ប្រធានក្លឹបបាល់ទាត់ព្រះខ័នរាជស្វាយរៀង បានបង្ហោះសារថ្លែងអំណរគុណ ចំពោះថ្នាក់ដឹកនាំ និងសមាជិកក្លឹបបាល់ទាត់បឹងកេតទាំងអស់ ដែលបានឯកភាពលើកថ្ងៃប្រកួតវគ្គពាក់កណ្តាលផ្តាច់ព្រ័ត្រ (ជើងទី២) នៃពានរង្វាន់សម្តេចអគ្គមហាសេនាបតីតេជោ ហ៊ុន សែន លើកទី១៨ ឆ្នាំ២០២៤/២៥។

ក្រោមការបង្ហោះរបស់ឯកឧត្តម ឌី វិជ្ជា មានខ្លឹមសារបន្តទៀតថា ការលើកថ្ងៃប្រកួតនេះ គឺដើម្បីទុកឱកាសឱ្យក្រុមកីឡាករ ក្លឹបបាល់ទាត់ព្រះខ័នរាជស្វាយរៀង មានពេលវេលាសមរម្យសម្រាប់សម្រាក និងហ្វឹកហាត់ត្រៀមប្រកួតវគ្គផ្តាច់ព្រ័ត្រនៃពានរង្វាន់ AFC Challenge League ដែលគ្រោងនឹងប្រព្រឹត្តទៅនៅថ្ងៃទី១០ ខែឧសភា ឆ្នាំ២០២៥ ខាងមុខនេះ។ ឯកឧត្តម ឌី វិជ្ជា បានកោតសរសើរចំពោះស្មារតីកីឡា និងការយោគយល់របស់ក្លឹបបាល់ទាត់បឹងកេត ដែលបានបង្ហាញពីសាមគ្គីភាព និងការគាំទ្រដល់ក្លឹបព្រះខ័នរាជស្វាយរៀង ក្នុងការចូលរួមប្រកួតប្រជែងលើឆាកអន្តរជាតិ។

គួរបញ្ជាក់ផងដែរ ការប្រកួតជើងទី១ របស់ព្រះខ័នរាជស្វាយរៀង ជាមួយបឹងកេត វគ្គពាក់កណ្តាលផ្តាច់ព្រ័ត្រ ពានរង្វាន់សម្តេចតេជោ ហ៊ុន សែន ធ្វើនៅថ្ងៃទី២៣ ខែមេសានេះ ខណៈជើងទី២ នៅថ្ងៃទី៧ ខែឧសភា ពោលគឺរយៈពេលត្រឹមតែ៣ថ្ងៃមុនការប្រកួតវគ្គផ្តាច់ព្រ័ត្រ AFC Challenge League ជាមួយក្រុម FK Arkadag នៅថ្ងៃទី១០ ខែឧសភា ឆ្នាំ២០២៥ នៅពហុកីឡដ្ឋានជាតិមរតកតេជោ៕