ប្រព័ន្ធផ្សព្វផ្សាយរដ្ឋបាននិយាយនៅថ្ងៃសៅរ៍ទី ២៦ ខែមេសាថា ប្រទេសកូរ៉េខាងជើងបានបង្ហាញនាវាចម្បាំងថ្មីមួយដែលខ្លួនអះអាងថាជានាវាពិឃាតបំពាក់ដោយអាវុធដ៏មានឥទ្ធិពលបំផុតនៅក្នុងពិធីបាញ់បង្ហោះដែលចូលរួមដោយមេដឹកនាំ Kim Jong Un ។

ការប្រកាសនេះធ្វើឡើងប្រហែលមួយខែបន្ទាប់ពីលោក Kim បានត្រួតពិនិត្យការសាកល្បងនៃយន្តហោះគ្មានមនុស្សបើកធ្វើអត្តឃាត និងឈ្លបយកការណ៍ថ្មីដែលមានបច្ចេកវិទ្យា AI ដោយបន្ថែមការព្រួយបារម្ភលើកិច្ចសហប្រតិបត្តិការយោធាកាន់តែស៊ីជម្រៅរបស់កូរ៉េខាងជើងជាមួយទីក្រុងម៉ូស្គូ។ នាវាចម្បាំង ប្រភេទនាវាពិឃាតទម្ងន់ ៥,០០០ តោន ដែលបានចំណាយពេលជាងមួយឆ្នាំក្នុងការសាងសង់ នេះបើយោងតាមទីភ្នាក់ងារសារព័ត៌មានកណ្តាលកូរ៉េផ្លូវការរបស់ទីក្រុងព្យុងយ៉ាង។

អ្នកជំនាញជឿថា កប៉ាល់នេះអាចផ្ទុកបានទាំងមីស៊ីលពីកប៉ាល់ទៅដី និងពីកប៉ាល់ទៅអាកាស ដោយវាទំនងជាត្រូវបានបំពាក់ដោយមីស៊ីលនុយក្លេអ៊ែរយុទ្ធសាស្ត្ររយៈចម្ងាយខ្លី។ លោក Kim បាននិយាយថា កងទ័ពជើងទឹកកូរ៉េខាងជើង ឥឡូវនេះអាចបម្រើជាសេវាកម្មស្នូលសម្រាប់ការពារជាតិ និងជាធាតុផ្សំនៃការរារាំងសង្គ្រាមនុយក្លេអ៊ែរ ហើយនាវានេះនឹងចូលដំណើរការនៅដើមឆ្នាំក្រោយ៕