នៅម៉ោង ៦៖៥០ ព្រឹក ថ្ងៃទី ២២ ខែមករា ឆ្នាំ ២០២៦ មានអគ្គិភ័យមួយបានកើតឡើងនៅក្នុងសហគមន៍វត្តស្រីបុរីរតនារាម (សហគមន៍វត្តព្រីយ៉ូ) នៅពីក្រោយស្ថានីយ៍រថភ្លើងសារ៉ាបុរី ឃុំប៉ាក់ព្រាវ ស្រុកមឿង ខេត្តសារ៉ាបុរី ប្រទេសថៃ ។ ក្រុមពន្លត់អគ្គិភ័យបានប្រញាប់ប្រញាល់ទៅកាន់កន្លែងកើតហេតុដើម្បីអន្តរគមន៍ភ្លាមៗ។

នៅកន្លែងកើតហេតុ ផ្ទះពីរជាន់ឈើលើ ថ្មក្រោមមួយខ្នងត្រូវអគ្គិភ័យឆាបឆេះយ៉ាងសន្ធោសន្ធៅ និងបានរាលដាលដល់ផ្ទះ ០២​ខ្នងផ្សេងទៀតដែលនៅក្បែរនោះផងដែរ។ ទោះជាយ៉ាងណាក៏ដោយ ដោយសារតំបន់ដែលអគ្គិភ័យកើតឡើង ជាតំបន់ដែលមានប្រជាជនរស់នៅច្រើន និងជាផ្លូវដាច់ស្រយាលមានផ្លូវចូលតូចចង្អៀតផងនោះ ធ្វើឱ្យការពន្លត់អគ្គិភ័យមានការលំបាក។ ក្រុមពន្លត់អគ្គិភ័យបានព្យាយាមបាញ់ទឹកពន្លត់ប្រហែល ៣០ នាទី ទើបអាចគ្រប់គ្រងភ្លើងបានទាំងស្រុង។ ជាលទ្ធផល ផ្ទះចំនួន ០៣​ ខ្នងដែលជាប់គ្នាត្រូវបានបំផ្លាញទាំងស្រុង។ដំបូងឡើយអ្នកភូមិបានឮសំឡេងផ្ទុះចេញពីជាន់លើ ដោយឃើញមានផ្សែងហុយ និងអណ្តាតភ្លើងឆាបឆេះ ហើយបានរត់ចេញក្រៅដោយសុវត្ថិភាព។ ប៉ូលិសបានត្រួតពិនិត្យកន្លែងកើតហេតុ ដោយថតរូបជាភស្តុតាង ហើយនឹងបញ្ជូនអ្នកស៊ើបអង្កេតផ្នែកកោសល្យវិច្ច័យទៅពិនិត្យកន្លែងកើតហេតុ ដើម្បីកំណត់មូលហេតុនៃអគ្គិភ័យនេះ៕