ស្ថានទូតអូស្ត្រាលីបានទៅទស្សនកិច្ចនៅមន្ទីរពេទ្យ ហ្លួង ម៉ែ ដើម្បីមើលពីផលប៉ះពាល់ជាវិជ្ជមានរបស់ Sara Chan (អ្នកព្យាបាលដោយកាំរស្មី) និង Joshua Southwell (អ្នករូបវិទ្យាវេជ្ជសាស្ត្រ) ដែលអ្នកស្ម័គ្រចិត្តអូស្ត្រាលីបានផ្តល់ដល់មន្ទីរពេទ្យ។ 

ស្ថានទូតអូស្ត្រាលីនៅថ្ងៃទី១០ខែមីនា ឆ្នាំ២០២៦ បានឱ្យដឹងថា តាមរយៈកម្មវិធីអ្នកស្ម័គ្រចិត្តអូស្ត្រាលី ពួកគេកំពុងផ្តល់ការបណ្តុះបណ្តាលបច្ចេកទេសតាមការអនុវត្តផ្ទាល់ ដល់សហសេវិកកម្ពុជា ដោយជួយលើកកម្ពស់សុវត្ថិភាព និងគុណភាពនៃការព្យាបាលជំងឺមហារីកសម្រាប់អ្នកជំងឺ។

មន្រ្តីស្ថានទូតអូស្ត្រាលីបញ្ជាក់ថាពិតជាមានកិត្តិយសដែលបានគាំទ្រអ្នកស្ម័គ្រចិត្តអូស្ត្រាលី ជាង ១ ០០០ នាក់នៅក្នុងប្រទេសកម្ពុជា ដែលបានចូលរួមចំណែកក្នុងវិស័យសំខាន់ៗរួមមាន សុខាភិបាល កសិកម្ម ពិការភាព ការអប់រំ និងបរិស្ថាន។ តាមរយៈការចែករំលែកជំនាញ និងការកសាងសមត្ថភាពក្នុងស្រុក អ្នកស្ម័គ្រចិត្តអូស្ត្រាលីបន្តពង្រឹងទំនាក់ទំនងរវាងប្រជាជន និងប្រជាជន ព្រមទាំងជួយគាំទ្រដល់ការអភិវឌ្ឍន៍របស់កម្ពុជាផងដែរ។

ជំងឺមហារីកជាបញ្ហាប្រឈមផ្នែកសុខភាពសាធារណៈដែលកំពុងវិវត្តជាខ្លាំងនៅក្នុងប្រទេសកម្ពុជា ហើយលទ្ធភាពទទួលបានការព្យាបាលឯកទេសនៅមានកម្រិតនៅឡើយ។ នេះជាហេតុធ្វើឱ្យការងារនៅមន្ទីរពេទ្យ ហ្លួង ម៉ែ ដែលជាមន្ទីរពេទ្យឯកទេសមហារីកដំបូងគេរបស់ប្រទេសកម្ពុជា កាន់តែមានសារៈសំខាន់៕